Միջ֊մասնաճիւղային տողանցքի նախօրեակին, Հ.Մ.Ը.Մ.ի Սուրիոյ մասնաճիւղերը, նախքան Հալէպ իրենց ժամանումը, կազմակերպեցին մարզական ներքին մրցաշարքներ, որոնց ախոյեան քոյրերուն եւ եղբայրներուն պարգեւատրումը տեղի ունեցաւ միջ-մասնաճիւղային տողանցքին, Հ.Մ.Ը.Մ.ի Սուրիոյ Շրջանային Վարչութեան ձեռամբ:

Այսպէս, Հ.Մ.Ը.Մ.ի Լաթաքիոյ մասնաճիւղին վարչութիւնը կազմակերպեց ճատրակի եւ լողի մրցաշարքներ։ Ախոյեան հանդիսացան.- եղբ. Յովսէփ Քէչէճեան (ճատրակ), քոյր Միրիամ Տէմիրճեան (լող) եւ եղբ. Րաֆֆի Ներսէսեան (լող)։

Հ.Մ.Ը.Մ.ի Գամիշլիի մասնաճիւղի վարչութիւնը կազմակերպեց փինկ-փոնկի մրցում, որուն ախոյեան հանդիսացաւ եղբ. Սեպուհ Սարգիսեան:

Հ.Մ.Ը.Մ.ի Հալէպի մասնաճիւղի վարչութիւնը կազմակերպեց Ճատրակի մրցում, ուր լաւագոյն խաղացող հանդիսացաւ եղբ. Կարին Պէրպէրեան:

Միջ-մասնաճիւղային տողանցքին Հալէպի մասնաճիւղէն պարգեւատրուեցան նաեւ 2020-2021 տարեշրջանի ճատրակի Սուրիոյ ախոյեաններ՝ եղբ. Արսէն Քինեան եւ քոյր Սինթիա Մախուլ:

Հ.Մ.Ը.Մ.ի Քեսապի մասնաճիւղի վարչութիւնը կազմակերպեց փինկ-փոնկի եւ ճատրակի մրցաշարքեր։ Ախոյեան հանդիսացան.- եղբ. Անդրանիկ Հանեսքէհեան (փինկ-փոնկ) եւ եղբ. Ժիրայր Կարճիկեան (ճատրակ)։

Տողանցքէն ժամեր առաջ, Հ.Մ.Ը.Մ.ի Սուրիոյ Շրջանային Վարչութիւնը Հալէպի մէջ կազմակերպեց ֆութպոլի եւ պասքեթպոլի միջ-մասնաճիւղային մրցաշարքներ, Հալէպի մասնաճիւղի պասքեթպոլի վերանորոգուած եւ ֆութպոլի նոր կառուցուած դաշտերուն վրայ: Ֆութպոլի մրցաշարքին ախոյեան հանդիսացաւ Գամիշլիի մասնաճիւղին խումբը, իսկ պասքեթպոլի մրցաշարքին ախոյեան հանդիսացան Հալէպի մասնաճիւղի տղոց եւ աղջկանց խումբերը: